AFRIKAANS 100 GEDENKLESINGS
Gedenklesings om hierdie mylpaal in Afrikaans se geskiedenis te vier en erkenning aan Afrikaans te gee word in die Weskaap en Gauteng aangebied.  Ons taaljuwele in die reis van Afrikaans, naamlik die Bo-Kaap, Genadendal, Paarl en Pretoria sal elk ’n noemenswaardige rol speel. Afrikaans het sy eerste tree in die Bo-Kaap gegee en dit is dus gepas dat die openingseremonie daar sal plaasvind met gedenkslesings wat in Genadendal, Paarl en Pretoria sal wees. Genadendal, sowat 135 km van Kaapstad, is ’n belangrike baken in die geskiedenis van Afrikaans. Dit is die tuiste van die eerste sendingstasie, die eerste Afrikaanse opleidingsentrum vir onderwysers was daar en De Bode van Genadendal (1859) was die eerste Afrikaanse koerant daar gedruk. Om hierdie geskiedkundige gebeure te herdenk, is daar ’n spesiale gedenklesing en huldeblyk oor en aan Afrikaans by Genadendal. Die Paarl het self diep spore in die taal getrap met onder meer die Eerste Afrikaanse Taalkongres wat in 1896 daar gehou is. Pretoria is ’n belangrike baken in Afrikaans. Dit is op 16 November 1855 gestig en die Universiteit van Suid-Afrika (1873) en die Universiteit van Pretoria (1908) is vandag steeds gerekende akademiese instellings.

Die gedenklesing in Pretoria sal deur Dr. Lindi Koorts behartig word. Dr. Koorts is ’n historikus en biograaf van Johannesburg.